„Ég veit ekki hvort það sé bara meiri metnaður í þeim“: Kynjuð sýn kvenkyns frístundaleiðbeinenda og stuðningsfulltrúa á starfshlutverk sitt

Kynjaðar væntingar hafa mótandi áhrif á einstaklinga í leik og starfi. Í kennslu- og umönnunarstarfi eru slíkar væntingar gjarnan ríkjandi þar sem búist er við að kynin staðfesti kyngervi sitt út frá starfshlutverki sínu. Konur sem starfa með yngra stigi barna eiga erfitt með að berjast gegn þessum kynjuðum væntingum vegna ríkjandi og rótgróinna hugmynda um kvenleika og þá eiginleika sem honum eru eignaðir. Þá benda niðurstöður rannsókna til þess að ætlast sé til meira af konum í starfinu og í kjölfarið lendi megin byrði starfsins á herðum þeirra fremur en karla. Skapast þá sú hætta að konur verði undir ofálagi og brenni hraðar út í starfi. Markmið rannsóknarinnar var að kanna hvort að sérstaða kvenna í kennslu- og umönnunarstarfi, sem mótast út frá kynjuðum væntingum, grafi undan jafnræði á starfsvettvanginum. Niðurstöður sýndu fram á að ætlast sé til meira af konum en körlum sem starfa í frístundastarfi vegna margvíslega þátta sem snúa að kyni og kyngervi. Helstu niðurstöður voru að konur eru alla jafna undir mun meira álagi í starfi og er úthlutað fleiri verkefnum innan starfsrammans frekar en körlum. Slíkar niðurstöður benda til þess að grafið sé undan jafnræði á starfsvettvanginum sem bæði bitnar á konum og körlum